Çlirohet Universiteti shtetëror i Athinës, pas ndërhyrjes së policisë

Ka marrë fund okupimi i Universitetit Kapodistria të Athinës, pas një operacioni të policisë në orët e para të së premtes. Policia nxorri nga brenda godinës 14 persona (shtatë meshkuj dhe shtatë femra), të cilët nuk bënë asnjë rezistencë.

Fillimisht, policia u bëri thirrje anarkistëve që të dalin nga godina, ata nuk pranuan dhe në vazhdim, me mandat nga prokuroria, filloi operacioni. U pre me sharrë hekuri porta anësore prej nga u futën policët dhe dolën pak më vonë me anarkistët e prangosur.

Gjatë operacionit, rreth dhjetë persona ishin grumbulluar jashtë godinës së rektoratit dhe hidhnin parrulla në mbështetje të okupuesve.

Okupimi i universitetit të Athinës zgjati 19 ditë dhe sipas të dhënave të para nuk duket se janë shkaktuar dëme serioze materiale në brendësi të ndërtesës.