Çmimet e karburanteve në rritje, Greqia ndërhyn me masa të reja

Qeveria greke ka prezantuar një paketë të re masash për të përballuar rritjen e vazhdueshme të çmimeve të karburanteve, e cila lidhet drejtpërdrejt me tensionet dhe konfliktet në Lindjen e Mesme. Përmes një adresimi televiziv, kryeministri Kyriakos Mitsotakis bëri të ditur se ndërhyrjet do të zbatohen gjatë muajve prill dhe maj dhe kapin një kosto totale prej rreth 300 milionë eurosh. Qëllimi kryesor i kësaj pakete është mbrojtja e familjeve dhe ekonomisë nga ndikimi i shtrenjtimit të energjisë.

Një nga masat kryesore është subvencionimi i naftës për automjete me 16 cent për litër në rrjetin e shpërndarjes, çka pritet të reflektohet në një ulje prej rreth 20 centësh në çmimin final për konsumatorët, duke përfshirë edhe TVSH-në. Krahas kësaj, rikthehet edhe Karta Digjitale e Karburantit, një instrument që ishte përdorur edhe më parë gjatë krizës së shkaktuar nga lufta në Ukrainë. Kjo kartë do të përdoret si në pikat e furnizimit me karburant, ashtu edhe në transportin publik dhe shërbimet e taksive, për të lehtësuar barrën financiare të qytetarëve.

Sipas përllogaritjeve të qeverisë, mbështetja mesatare arrin në rreth 36 cent për litër. Për një konsum mesatar prej 70 litrash në muaj, kjo do të thotë një kursim prej rreth 50 eurosh për dy muaj në territorin kontinental dhe rreth 60 euro në ishuj, ku kostot janë zakonisht më të larta.

Paketa përfshin gjithashtu masa mbështetëse për sektorin bujqësor, përmes subvencionimit të 15% të kostos së plehrave kimike. Njëkohësisht, parashikohet edhe kompensim për kompanitë e transportit detar, me kusht që ato të aplikojnë ulje në çmimet e biletave, duke i mbajtur ato në nivelet e vitit të kaluar.

Autoritetet bëjnë të ditur se fondet për këto masa do të sigurohen nga buxheti i shtetit dhe nga taksimi i fitimeve të operatorëve të lojërave online. Në të njëjtën kohë, qeveria thekson se do të ruajë rezerva financiare për çdo përkeqësim të mundshëm të situatës ekonomike globale. Detaje të mëtejshme mbi zbatimin e masave pritet të jepen nga përfaqësuesit e Ministrisë së Ekonomisë gjatë një konference për shtyp.