Covid-19/ Rusia ka pak të infektuar, ja rruga e suksesit

Në një kohë kur pothuajse e gjithë Europa ka dhënë sinjalin e kuq nga Covid-19, Rusia ja ka dalë që të ketë pak të prekur. Presidenti rus, Vladimir Putin, u shpreh gjatë kësaj jave se vendi i tij ja ka dalë të menaxhojë situatën e përhapjes së koronavirusit. Sipas tij, deri më tani çdo gjë është nën kontroll, falë masave të marra për të mbajtur popullin larg infektimit.

A është vërtet situata nën kontrroll? Nëse po, çfarë strategjie po ndjek Rusia ndryshe nga pjesa tjetër e botës?

Numri i të infektuarëve në Rusi deri më tani është shumë i ulët, duke marrë parasysh kufirin me Kinën dhe që rasti i parë me COVID-19 është shënuar që prej janarit. Rusia ka një popullsi prej 146 milionë banorë dhe vetëm 253 prej tyre kanë rezultuar të infektuar. Masat e marra që herët, mbyllja e kufirit me Kinën që prej 30 janarit dhe vendosja e shpejtë e zonave të projektuara për karantinë, ka ndihmuar që përhapja të mos jetë masive.

Që prej janarit, Rusia ka ndjekur këshillën numër 1 të OBSH-së që është testimi masiv i popullsisë. Testimi i njerëzve, identifikimi i shpejtë i rasteve, izolimi dhe gjithë masat e tjera të rekomanduara, ky vend i mori në kohën e duhur. Edhe distancimin social, Rusia është një nga vendet që e filloi më herët. Rusia ka nisur të testojë njerëzit që prej fillimit të shkurtit, përfshi këtu të gjithë aeroportet e mbushura me njërëz që vinin kryesisht nga Irani, Kina apo Korea e Jugut. Pjesa më e madhe e të infektuarëve në Rusi ka ardhur nga Italia dhe kjo sepse njerëzit që vinin nga Italia nuk u testuan në kohë.

Nga ana tjetër, Putin u shpreh se edhe qeveria ndoshta nuk ka statistikat e një numri të saktë të infektuarish i cili mund të jetë edhe më i madh se aq, pasi një pjesë e mirë e njerëzve nuk tregojnë, ose e kalojnë pa simptoma. Vetëm këtë javë, numri i të infektuarëve është rritur. Çdo ditë, Rusia konfirmon 30, 40 raste të reja dhe numri i testimeve po zgjerohet ndjeshëm. Paralel me situatën, edhe qeveria ka përshkallëzuar masat, duke pezulluar çdo event dhe mbyllur kufinjtë.