Danimarka rrit moshën e daljes në pension, më e larta në Evropë

Danimarka do të ketë moshën më të lartë të daljes në pension në Evropë, pas miratimit të një ligji të ri nga parlamenti që rrit moshën e pensionimit në 70 vjeç.

Me 81 vota pro dhe 21 kundër, ligjvënësit vendosën që ndryshimi të zbatohet për personat e lindur pas 31 dhjetorit 1970. Aktualisht, mosha mesatare e daljes në pension në Danimarkë është 67 vjeç, por për ata të lindur më 1 janar 1967 ose më vonë, ajo shkon deri në 69 vjeç.

Ministrja e Punësimit, Ane Halsboe-Jørgensen, tha se kjo rritje është e domosdoshme për të garantuar mirëqenie të qëndrueshme për brezat e ardhshëm. Danimarka ka rreth 6 milionë banorë, me mbi 700,000 persona në moshën 60-69 vjeç dhe rreth 580,000 në grupmoshën 70-79 vjeç.

Për më tepër, rreth 80,000 pensionistë aktualisht vazhdojnë të punojnë, falë kushteve të mira ekonomike, fleksibilitetit nga punëdhënësit, stimujve financiarë dhe dëshirës për të qëndruar aktivë në punë.