Dh*noi gjyshen, artistja befason gjyqtaren: “Duhet të promovoj këngën në Instagram”

Një situatë e pazakontë është regjistruar në një gjykatë në Milano, ku 26-vjeçarja Emanuela Maria Lamedica, e njohur artistikisht si Lamedica, kërkoi lirimin nga qelia me një argument të veçantë. Artistja i tha gjyqtares se kishte një angazhim profesional që nuk mund ta humbiste: promovimin në rrjetet sociale të këngës së saj të re.

Lamedica ishte arrestuar pas denoncimit të bërë nga gjyshja e saj dhe përballet me akuza për sjellje abuzive dhe fyerje verbale ndaj të moshuarës. Gjatë seancës për vlerësimin e masës së sigurisë, ajo iu drejtua gjyqtares Chiara Valori duke kërkuar të rikthehej në shtëpi, pasi kënga e saj e re do të publikohej në Spotify dhe duhej ta reklamonte në Instagram.

“Duhet të publikoj në Instagram për të promovuar këngën time”, mësohet të ketë deklaruar 26-vjeçarja.

Kërkesa e saj shkaktoi reagime në sallën e gjyqit, ndërsa gjyqtarja e vlerësoi çështjen mbi bazën e rrethanave ligjore. Sipas mbrojtjes, rasti lidhet me sjellje të papërshtatshme dhe ofendime ndaj gjyshes, ndërsa avokatja ka mohuar që të ketë pasur një sulm fizik.

Artistja foli gjithashtu për natën që kishte kaluar në burgun San Vittore dhe kushtet atje. Pavarësisht situatës, ajo vijoi të këmbëngulte për rëndësinë e angazhimeve të saj artistike. Kënga “Maniere forti” është pjesë e projektit të saj të ri muzikor, pas publikimit të “Barbie nel ghetto”.

Në fund të seancës, gjyqtarja vendosi lirimin e Lamedicas nga burgu, por caktoi masa kufizuese. Ajo do të mbajë një byzylyk elektronik dhe nuk do të ketë të drejtë të kontaktojë me gjyshen, e cila konsiderohet palë e dëmtuar në çështje.

Pas lirimit, artistja vijoi aktivitetin e saj në rrjetet sociale dhe publikoi materiale për promovimin e këngës së re. Në një prej postimeve, ajo u kërkoi ndjekësve ta dëgjonin dhe ta shpërndanin këngën, duke shkruar: “Ndajeni me të gjithë, veçanërisht me armiqtë e mi”.