Donald Trump mirëpret 3 amerikanët të liruar nga Koreja e Veriut

Tre të burgosurit amerikanë të liruar vetëm një ditë më parë nga Koreja e Veriut kanë mbërritur në Shtetet e Bashkuara, ku ata janë mirëpritur nga presidenti Donald Trump. Lirimi i tyre vjen në prag të samitit historik mes Trump dhe udhëheqësit koreano-verior, detajet për të cilin do të bëhen publike brenda pak ditësh.

Presidenti Donald Trump ka mirëpritur tre ish të burgosurit amerikanë të liruar nga Koreja e Veriut. Teksa ata mbërritën në Bazën e Forcës Ajrore Andrews pranë Uashingtonit, Trump e konsideroi rastin si një “natë speciale për këta tre burra të mrekullueshëm”. I shoqëruar nga bashkëshortja e tij Melania, presidenti dhe ish të burgosurit përshëndetën edhe mediat.

Përpara se të mbërrinin në Shtetet e Bashkuara, tre ish të burgosurit Kim Hak-song, Tony Kim dhe Kim Dong-chul falenderuan zotin Trump, sekretarin e shtetit Mike Pompeo dhe popullin amerikan të cilët mundësuan kthimin e tyre në shtëpi. Të tre burrat ishin burgosur në Korenë e Veriut për veprimtari anti-shtetërore dhe ishin vendosur në kampet e punës në vendin e izoluar. Ata fluturuan nga vendi aziatik me zotin Pompeo, i cili konfirmoi se shëndeti i tyre ishte i mirë, nisur nga fakti se tre shtetasit kishin mëse 1 vit që ndodheshin në burg. Sipas Shtëpisë së Bardhë, lirimi është kryer si një gjest i vullnetit të mirë përpara takimit të planifikuar mes zotit Trump dhe udhëheqësit koreano-verior Kim Jong-un.

Kim Jong-un deklaroi se ai kishte pranuar propozimin e Shteteve të Bashkuara për t’i garantuar të burgosurve një amnisti, duke shtuar se takimi i tij me presidentin Trump, do të ishte një “hap i parë i mrekullueshëm” drejt përmirësimit të situatës në gadishullin korean. Sa i përket këtij takimi të shumëpritur, presidenti Trump konfirmoi se vendi dhe data do të bëhen publike “brenda tre ditësh”. Zona e demilitarizuar që ndan dy Koretë është përjashtuar nga vetë kreu amerikan i shtetit si pikëtakim për palët.