Dy të vdekur dhe nëntë të plagosur nga të shtënat në Universitetin Brown, ndërsa i dyshuari mbetet i lirë

Një ngjarje e rëndë dhe tronditëse ka goditur komunitetin akademik amerikan. Dy persona humbën jetën dhe të paktën nëntë të tjerë mbetën të plagosur pas të shtënave me armë zjarri brenda kampusit të Universitetit Brown, në qytetin verilindor të Providence, Rhode Island. Autoritetet lokale konfirmuan se të plagosurit ndodhen në gjendje kritike, por të stabilizuar, ndërsa situata mbetet ende nën hetim intensiv.

Kryebashkiaku i Providence, Brett Smiley, deklaroi se i dyshuari për sulmin ishte ende në arrati në momentet e para pas ngjarjes, duke ngritur alarmin maksimal të sigurisë në qytet. Sipas policisë, sulmi ndodhi brenda një ndërtese universitare ku zhvillohen mësime dhe kërkime në fushat e inxhinierisë dhe fizikës, një hapësirë që përfshin klasa mësimi dhe laboratorë shkencorë.

Motivet e autorit mbeten të paqarta, ndërsa zyrtarët e universitetit bënë të ditur se të gjitha viktimat ishin studentë dhe se incidenti ndodhi në një moment veçanërisht delikat të vitit akademik, gjatë zhvillimit të provimeve përfundimtare. Kjo e bën ngjarjen edhe më dramatike, duke goditur drejtpërdrejt një mjedis që simbolizon dijen, përpjekjen dhe të ardhmen.

Në vendngjarje u angazhuan mbi 400 efektivë të forcave të rendit, përfshirë edhe agjentë të FBI-së, çka dëshmon për seriozitetin e situatës dhe frikën e përhapjes së rrezikut. Policia publikoi më vonë një video ku shfaqej i dyshuari i veshur me rroba të zeza, pa i dalluar qartë tiparet e fytyrës, ndërsa u konfirmua se ai ishte larguar nga kampusi në këmbë.

Presidenti i Shteteve të Bashkuara, Donald Trump, shkroi fillimisht në platformën e tij Truth Social se autori i sulmit ishte vënë në pranga, por më pas e korrigjoi deklaratën, duke sqaruar se informacioni paraprak kishte qenë i pasaktë.

Universiteti Brown, një nga institucionet më prestigjioze private të Ivy League, ndodhet në Providence, kryeqyteti i Rhode Island, një qytet me rreth 200 mijë banorë, i shtrirë në jug të Bostonit. Ngjarja ka shkaktuar tronditje të thellë jo vetëm në komunitetin universitar, por edhe në mbarë opinionin publik amerikan.

Ky sulm i përgjakshëm i shtohet një liste të gjatë incidentesh të dhunës me armë në Shtetet e Bashkuara, të cilat ndodhin rregullisht në shkolla, vende pune, supermarkete, klube nate dhe aktivitete publike masive. Lehtësia e aksesit në armë zjarri, përfshirë armë gjysmëautomatike, vazhdon të mbetet një nga çështjet më të debatueshme dhe më të ndjeshme në shoqërinë amerikane.

Pavarësisht indinjatës dhe tronditjes së përsëritur pas masakrave të tilla, përpjekjet për të forcuar dhe shtrënguar legjislacionin mbi kontrollin e armëve kanë dështuar për vite me radhë, duke lënë hapur plagën e një problemi strukturor që vazhdon të marrë jetë njerëzish dhe të cenojë sigurinë publike.
AV/KJ