E fshehur në xhungël, kapet kokainë me vlerë 200 milionë dollarë në Amerikën e Jugut

Autoritetet në Guajana njoftuan se kanë bllokuar 3.6 tonë kokainë, të gjetur në një xhungël, pranë kufirit me Venezuelën.

Sipas AP, kjo sasi droge konsiderohet më e madhja në historinë e fundit të vendit të Amerikës së Jugut dhe ministri i Sigurisë, Robson Benn, u tha gazetarëve se ai vlerëson se droga kap vlerën e të paktën 200 milionë dollarëve.

Droga u gjet e futur në gropa në rajonin veriperëndimor të Guajanës dhe policia ka arrestuar një të dyshuar. Ajo pohoi se po kërkon dy persona të tjerë, që u larguan nga vendi i ngjarjes.

Policia dhe ushtria e Guajanës, së bashku me Agjencinë Amerikane të Zbatimit të Drogës (DEA), u përfshinë në operacion. “Ne jemi mirënjohës që kemi DEA-n me ne duke shkëmbyer informacione dhe inteligjencë.

“Guajana është “viktimë” e këtij aktiviteti të paligjshëm. Ne nuk prodhojmë kokainë dhe nuk e transportojmë atë”, tha Ben.

Droga u sekuestrua në një zonë ku policia ka gjetur anije të improvizuara nënujore të fshehura në xhungël vitet e fundit dhe zyrtarët nuk janë të sigurt nëse mjetet lundruese ishin përdorur në të vërtetë, por thanë se ato do të rrisnin mbikëqyrjen në rajon.