Erdogan përkujton viktimat e Srebrenicës: Nuk do ta harrojmë kurrë këtë gjenocid

Presidenti i Turqisë, Recep Tayyip Erdoğan, ka përkujtuar viktimat e gjenocidit të Srebrenicës në 31-vjetorin e masakrës, duke e cilësuar atë si një nga krimet më të rënda dhe më brutale të historisë moderne.

Përmes një mesazhi të publikuar në rrjetet sociale, Erdogan shprehu nderimin dhe dhimbjen për mijëra boshnjakët e vrarë në korrik të vitit 1995, duke theksuar se kujtimi i tyre nuk do të harrohet.

“Në 31-vjetorin e gjenocidit të Srebrenicës, një nga gjenocidet më brutale në histori, kujtoj me pikëllim dhe mëshirë të gjithë vëllezërit dhe motrat tona boshnjake që u masakruan. Nderoj me respekt kujtimin e çmuar të martirëve tanë dhe lutem për durim dhe forcë për familjet dhe të dashurit e tyre. Nuk do ta harrojmë kurrë Srebrenicën”, shkroi presidenti turk.

Masakra e Srebrenicës, e ndodhur në korrik të vitit 1995 gjatë luftës në Bosnje dhe Hercegovinë, konsiderohet gjenocidi më i rëndë i kryer në Evropë pas Luftës së Dytë Botërore, ku u vranë mbi 8 mijë burra dhe djem boshnjakë.

Me rastin e përvjetorit të 31-të të kësaj tragjedie, në Bosnje dhe Hercegovinë dhe në vende të ndryshme të botës janë zhvilluar ceremoni përkujtimore në nder të viktimave.