FBI bastis shtëpinë e John Bolton, kërkonte t’i hiqej ”non-grata” Berishës

FBI ka bastisur banesën e John Bolton, ish-këshilltarit për Sigurinë Kombëtare gjatë mandatit të parë të Donald Trump, i cili sot është kthyer në një nga zërat më kritikë ndaj presidentit amerikan. Bastisja nga agjentët federalë është pjesë e një hetimi mbi sigurinë kombëtare, i urdhëruar nga drejtori i FBI-së, Kash Patel.

Kontrolli është kryer në orën 7 të mëngjesit në shtëpinë e Bolton në Bethesda, Maryland. Bastisja e banesës së Bolton vjen në kuadër të një hetimi mbi menaxhimin e dokumenteve të klasifikuara, ndërkohë që administrata Trump ka ndërmarrë masa për të shqyrtuar veprimtarinë e disa figurave të dyshuara si kritike ndaj presidentit.

Bolton është një emër i njohur edhe për shqiptarët. Vetëm 2 muaj më parë ai u shfaq kritik për non gratën e Sali Berishës nga SHBA, duke e quajtur një vendim jo të drejtë e kërkonte nga administrata Trump që ky vendim të rishihej. Tashmë vetë Bolton është në vështirësi dhe do duhet të përballet me drejtësinë.