Funerali i Nemtsov, Rusia ndalon pjesmarrjen e politikanëve perëndimorë
Lideri i opozitës ruse, Boris Nemtsov, i vrarë pak ditë më parë është përcjellë sot në banesën e fundit.
Ceremonia e varrimit u zhvillua sot në Moskë, ndërsa disa politikanë evropianë thonë se janë ndaluar të hyjnë në Rusi për të marrë pjesë në funeralin e Nemtsov.
Varrimi i tij në varrezën moskovite të Troiekurovskoies u parapri nga një ceremoni publike në qendrën ”Sakharov”, muze kushtuar të Drejtave të Njeriut dhe akademistit disident sovjetik Andrei Sakharov, “Ishte dikush të cilin e ndjeja të afërt. Dëshiroj t’i them lamtumirë. Ishte një njeri që kishte principe, një njeri karizmatik. Pak rëndësi ka kush e vrau, kjo është një humbje e pariparueshme”, theksoi Maria Koniakova, një psikologe.
Në këtë ceremoni ishin të pranishëm ish-kryeministri në kohën e Putinit, kaluar tashmë në opozitë, Mikhail Kassianov, ish-kryeministri britanik, John Major dhe ambasadori i SHBA-së, John Tefft, i cili shprehu dhimbjen e thellë të presidentit dhe popullit amerikan për vdekjen e këtij patrioti të madh rus.
Një kurorë u dërgua nga kryeministri rus, Dmitri Medvedev dhe disa anëtarë të qeverisë ishin të pranishëm për të bërë homazhe për Boris Nemtsov, veçanërisht zëvendëskryeministri, Arkadi Dvorkovitch dhe Serguei Prikhodko.
Në mesin e atyre që iu është refuzuar kërkesa është edhe Kryetari i Senatit të Polonisë, Bogdan Borusevicz. “Doja të tregoja respektin që e kam pasur për Boris Nemtsovin dhe për të gjithë rusët që mendojnë si ai”, ka thënë Borusevicz, i cili ka qenë disident në kohën e komunizmit.
Boris Nemtsov u vra në një urë pak metra larg Kremlinit, në orët e vona të datës 27 shkurt, ndërsa shoqërohej nga e dashura e tij, Anna Duritska, e cila është lejuar të largohet nga Rusia për tu kthyer në atdheun e saj, Ukrainë.
Presidenti rus, Vladimir Putin, e ka quajtur vrasjen provokim, ndërsa ai nuk do të marrë pjesë në funeral. Më 2 mars, ministri i jashtëm rus, Sergei Lavrov, ka thënë se vrasja e Nemtsovit nuk duhet të përdoret për “qëllime politike”.
