Gjermania dhe Islanda thellojnë bashkëpunimin ushtarak

Në kushtet e rritjes së kërcënimeve ruse në rajonin e veriut,  Gjermania dhe Islanda kanë rënë dakord të forcojnë bashkëpunimin e tyre ushtarak, duke hapur rrugën për projekte të reja logjistike dhe mbrojtëse në Atlantikun e Veriut.

Forcat e armatosura gjermane synojnë të krijojnë një pikë mbështetjeje në Islandë,  ku do të ankorohen anije luftarake,  nëndetëse dhe mjete furnizimi. Kjo nismë vjen si pjesë e një memorandumi mirëkuptimi të nënshkruar në Reykjavik,  me fokus në logjistikën detare.

Ministri gjerman i Mbrojtjes,  Boris Pistorius,  pas takimit me ministren e Jashtme islandeze,  Þordís Kolbrun Reykfjorð Gylfadóttir,  theksoi rëndësinë strategjike të Islandës:

“Këtu në veri të largët,  Islanda po jep një kontribut jetik për mbrojtjen e krahut verior të aleancës.”

Islanda, anëtare themeluese e NATO-s që prej vitit 1949,  nuk ka ushtri të rregullt, por ofron infrastrukturë portuale moderne. Gjermania po shqyrton dislokimin e përkohshëm të avionëve zbulues P-8A Poseidon,  si pjesë e angazhimit të saj në rajon.

Ministrja Gylfadóttir e cilësoi Gjermaninë si “forcën udhëheqëse në forcimin e sigurisë dhe mbrojtjes së Europës”,  duke nënvizuar planet për bashkëpunim më të ngushtë me forcat ajrore dhe marinën gjermane.

Të dy vendet angazhohen gjithashtu në përballimin e sulmeve hibride dhe kërcënimeve ndaj komunikimeve në internet.

Lufta hibride përfshin mjete ushtarake,  ekonomike,  të inteligjencës dhe propagandës,  me qëllim destabilizimin e shoqërive dhe ndikimin e opinionit publik.