Gjobitet emisioni satirik gjerman në Groenlandë pas tentativës për të ngritur flamurin e SHBA-së

Një emision satirik gjerman u gjobit në Groenlandë pasi një anëtar i ekipit të prodhimit tentoi të ngrinte një flamur amerikan në një hapësirë publike. Incidenti ndodhi gjatë xhirimeve për emisionin “Extra 3” të transmetuesit NDR, në sfondin e debatit ndërkombëtar mbi statusin politik të Groenlandës dhe deklaratave të përsëritura të Presidentit amerikan Donald Trump për blerjen ose zotërimin e ishullit, i cili është pjesë e Mbretërisë së Danimarkës.

Komiku bavarez Maxi Schafroth u përpoq të ngrinte flamurin amerikan pranë qendrës kulturore në Nuuk, kryeqytetin e Groenlandës, por u përball me kalimtarë. Ai pretendoi se ishte një zyrtar amerikan. Policia mbërriti dhe vendosi një gjobë, ndërsa një hetim është në vazhdim.

Kryebashkiakja e distriktit Kommuneqarfik Sermersooq, Avaaraq Olsen, shprehu indinjatën e saj, duke deklaruar se “ngritja e flamurit të një superfuqie ushtarake që prej javësh ka nënkuptuar forcë ushtarake kundër vendit tonë, nuk është shaka”. Ajo e quajti veprimin “jashtëzakonisht të dëmshëm” dhe theksoi se groenlandezët, veçanërisht fëmijët, ishin të shqetësuar. Olsen kritikoi shfrytëzimin e frikës për përmbajtje ose klikime, duke shtuar se kjo rrit ankthin e një popullsie tashmë të cenueshme.

Transmetuesi NDR u shpreh se segmenti synonte të ishte një përgjigje kritike dhe satirike ndaj veprimeve dhe deklaratave të diskutueshme ndërkombëtarisht të SHBA-së lidhur me Groenlandën. Ata theksuan se satira nuk ishte drejtuar kurrë ndaj groenlandezëve dhe shprehën keqardhje nëse ishte krijuar një përshtypje e tillë. Trump ka folur vazhdimisht për aneksimin e Groenlandës, duke përmendur blerjen ose forcën ushtarake, dhe ka justifikuar interesin e tij me rrezikun nga Rusia ose Kina.

Marrë nga Deutsche Welle