Gjykata e Lartë e çon në burg ish-Presidentin

Në një kthesë të jashtëzakonshme të çështjes gjyqësore kundër një prej politikanëve më popullorë të Brazilit, ish-presidenti Luiz Inacio Lula Da Silva do të shkojë pas hekurave, ndërsa apelon dënimin për korrupsion.

Ai përballet me 12 vite burg mbi akuzat për mitmarrje, por kishte kërkuar të qëndronte në liri gjatë gjykimit. Lula da Silva pretendon se akuzat janë të motivuara politikisht dhe synojnë të pengojnë kandidimin e tij në zgjedhjet presidenciale të tetorit.

Gjykata e Lartë vendosi kundër tij pas një seance maratonë që përfundoi në orët e para të së enjtes. Ish-presidenti 72-vjeçar pritet të qëndrojë i lirë për një periudhë të shkurtër kohe, deri sa të përgatiten dokumentet për arrestimin e tij.

Partia e Punëtorëve e ish-liderit, tha se kjo ishte një ditë tragjike për demokracinë në Brazil. Deri kohët e fundit të akuzuarit në vend, mund të qëndronin në liri deri sa të konsumohej apeli i fundit.

Megjithatë Gjykata e Lartë shqyrtoi një vendim të 2016-ës nga një gjykatë më e ulët, mbi bazë të së cilës të akuzuarit mund të burgosen pas dështimit të apelimit të parë.