Groenlanda… miti i metaleve të rralla dhe pse nuk është zgjidhja e lehtë për Trumpin?

Mjedisi i ashpër i Groenlandës, mungesa e infrastrukturës dhe gjeologjia sfiduese kanë penguar zhvillimin e minierave të metaleve të rralla, lëndë e nevojshme për teknologjitë e larta. Edhe nëse SHBA-ja nën Trump do të marrë kontrollin e ishullit, këto pengesa nuk do të zhduken.

Trump ka bërë prioritet uljen e varësisë së Perëndimit nga Kina për tregun global të metaleve të rralla, veçanërisht pas kufizimeve kineze ndaj eksporteve. Qeveria amerikane ka investuar qindra miliona dollarë dhe ka blerë aksione në kompani të sektorit, duke sugjeruar se një shkëputje e Groenlandës nga Danimarka mund të jetë një zgjidhje, madje me kompensim deri në 100,000 dollarë për secilin banor.

Megjithatë, Groenlanda mund të mos prodhojë metale të rralla për shumë vite, për shkak të izolimit, klimës së ashpër dhe natyrës komplekse të shkëmbinjve ku gjenden metale si neodimi dhe terbiumi, të përdorura në magnete, turbinat e erës dhe teknologjitë ushtarake. Përveç kësaj, proceset minerare mund të shkaktojnë ndotje serioze në një ekosistem të brishtë.

Analistët theksojnë se SHBA-të mund të përqendrohen te projektet ekzistuese dhe të provuara në vendet mike, si Australia, ose te kompanitë amerikane si MP Materials, e vetmja minierë e metaleve të rralla në SHBA. Përpjekjet në Groenlandë janë larg nga ndërtimi i një miniere të funksionueshme dhe do të kërkojnë qindra miliona dollarë investime dhe ndërtimin e infrastrukturës nga e para.

Ekspertët vënë në dukje se ndërsa SHBA përpiqet të zvogëlojë ndikimin kinez, prodhimi global i metaleve të rralla mbetet i përqendruar mbi 90% në Kinë. Çdo përpjekje në Groenlandë është e vështirë, shtrenjtuese dhe kërkon kohë, duke e bërë ishullin një sfidë të madhe për energjinë dhe teknologjinë e Perëndimit.