Hamasi hiqet nga lista e organizatave terroriste prej Gjykatës Evropiane

Drejtësia evropiane anuloi për mungesë proceduriale vendosjen e lëvizjes palestineze Hamas në listën e organizatave terroriste të BE-së, por duke i mbajtur të ngrira të ardhurat e kësaj organizate në Evropë.

Gjykata theksoi se “ky anulim nuk ka të bëjë me asnjë rivlerësim të cilësimit të lëvizjes Hamas si grup terrorist”. BE-ja e kishte vendosur Hamasin në listën e zezë në dhjetor 2001.

“Këshilli ka tre muaj që të marrë një vendim të ri mbi ngrirjen e fondeve, ose dy muaj për të vajtur në apel në Gjykatën e BE-së kundër këtij vendimi”, shtoi drejtësia evropiane në një komunikatë.

Në saj të padisë të deponuar nga Hamasi, Gjykata konstatoi se “vendosja e tij në këtë listë nuk bazohet në fakte të ekzaminuara dhe mbështetur në vendimet e autoriteteve kopetente kombëtare, por është bazuar në elemente të nxjerra nga shtypi dhe interneti”.