Hapja e shkollave në Europë, mes “normalitetit” dhe masave strikte të qeverive

Shkollat do të hapen me masa strikte. Spanjën e presin muaj tepër të vështirë nga pandemia koronavirus. Paralajmërimi është lëshuar nga kryeministri, Pedro Sanchez, i cili u kërkoi ministrave të tij mobilizim më të shpejtë për të luftuar përhapjen e Covid-19.

Edhe shtete të tjera europiane po bëhen gati që nga shtatori të nisin vitin e ri shkollor në atë që po konsiderohet normaliteti i ri. Qeveritë kanë punuar prej muajsh për një plan që garanton siguri për shëndetin e fëmijëve. Franca do ta bëjë të detyrueshme mbajtjen e maskës në ambiente të mbyllura për mësuesit dhe nxënësit mbi 11 vjeç. Pritet që kufizimet për numrin fëmijëve në klasa dhe udhëzimi për distancimin fizik të hiqen.

Sa i përket Gjermanisë, institucionet arsimore po shtojnë masat higjieno-sanitare, por mbajtja e maskës nuk është e detyrueshme në shkolla. Mësimi ka filluar, por dy shkolla janë mbyllur në vend pas konfirmimit të disa rasteve. Edhe Italia ka vendosur masa strikte për vitin e ri shkollor. Duhet të ruhet distanca sociale prej të paktën 1 metër dhe mbajtja e maskës është e detyrueshme si për mësuesit ashtu edhe për nxënësit.