Hetimi për Rusinë, Mueller mund të detyrojë Trump të dëshmojë në gjykatë

Në rast se Donald Trump refuzon të bashkëpunojë me hetimin për Rusinë, atëherë prokurori i posaçëm Robert Mueller mund ta detyrojë presidentin të dëshmojë në gjykatë. Mediat amerikane raportojnë se zoti Mueller ka parashtruar një mundësi të tillë gjatë një takimi me avokatët e Presidentit në muajin mars.

Prokurori i Posaçëm Robert Mueller ka paralajmëruar mundësinë e thërritjes në gjykatë të Donald Trump, si pjesë e hetimit mbi ndikimin e pretenduar rus në zgjedhjet presidenciale të 2016.

Sipas një shkrimi të The Washington Post, zoti Mueller e ka sugjeruar këtë gjatë bisedave që ai ka zhvilluar me avokatët e presidentit në muajin mars.

Thirrja për të dëshmuar mund të detyrojë kreun amerikan të shtetit të përballet me hetuesit, ndërsa kjo është hera e parë që Mueller ngre një mundësi e tillë.

Gjatë takimit me prokurorin e posaçëm, avokatët e Trump kanë këmbëngulur në faktin se presidenti nuk ka asnjë detyrim që të përballet me pyetjet e hetuesve federalë në lidhje me hetimin për Rusinë.

Sidoqoftë, skuadra e Mueller raportohet të ketë sugjeruar lëshimin e një fletëthirrjeje për në gjykatë në rast se zoti Trump refuzon.

Mediat amerikane madje kanë zbuluar edhe dhjetëra pyetje që Mueller u ka dhënë avokatëve të Presidentit.

Ndër të tjera, skuadra hetuese kërkon të dijë nga Trump arsyet e shkarkimit të drejtorit të FBI-së, James Comey, majin e vitit të kaluar dhe kontaktet e fushatës së republikanit me zyrtarët rusë.

Por Presidenti e ka quajtur “të turpshëm” faktin që lista e pyetjeve të Mueller është bërë publike në media.