Homazhe për 9 viktimat e sulmeve raciste në Gjermani

Shtimi i sulmeve raciste dhe ksenofobe ka bërë bashkë mijëra qytetarë gjermanë duke denoncuar atë që ata e quajtën helmin e ri të shoqërisë.

Homazhe u mbajtën në 50 qytete të Gjermanisë për viktimat e dy sulmeve me armë nga një shtetas gjerman me bindje të ekstremit të djathtë.

Dhjetëra mijëra qytetarë kudo në Gjermani u kanë bërë homazhe viktimave të sulmeve raciste në vend.

Nëntë persona, shumica me kombësi turke, u vranë të mërkurën mbrëma në dy lokale nargjileje në qytetin e vogël të Hanaut, afër Frankfurtit, ndërsa i dyshuari, 43-vjeçari Tobias Ratjen, u gjet i vetëvrarë me armë në banesën e tij së bashku me të ëmën.

Prokurorët thonë se personi ishte ithtar i grupeve të ekstremit të djathtë, me bindje ksenofobe.

“Ne nuk kemi për t’u ndarë. Ne vajtojmë bashkë kundër racizmit dhe dhunës urrejtëse. Unë jam në krahun e atyre që ndihen të kërcënuar nga to,” u shpreh presidenti gjerman, Frank-Valter Shtajnmajër, nga qyteti i vendngjarjes.

Homazhe u mbajtën në orën 18 edhe në 50 qytete të tjera gjermane, ku u denoncua racizmi dhe ksenofobia.

“Ne jemi të gjithë me prejardhje turke, por e ndiejmë Gjermaninë si shtëpinë tonë, si vendin tonë,” shprehet një qytetare.

“Kjo është shumë e tmerrshme. Kam jetuar në Gjermani prej 20 vitesh dhe nuk jam ndjerë asnjëherë i huaj. Por dje, sot, më duket vetja si burim tensioni,” shton një tjetër banor.

Policia ka njoftuar se po heton nëse autori i vrasjeve të dy ditëve më parë është ndihmuar nga persona të tjerë.

Ai ishte pjesë e klubit lokal të gjuetarëve ndërsa para vetëvrasjes kishte postuar një manifest në internet me teori konspirative dhe pikëpamje raciste.