Italia ka numrin më të lartë të të varfërve në BE

Italia është vendi me numrin më të lartë të të varfërve në Bashkimin Europian. Të dhënat e Eurostat tregojnë se megjithëse Italia e ka varfërinë në shifrat e 11% dhe Rumania dhe Bullgaria përkatësisht 49,7% dhe 47,9%, në terma absolutë janë 10,4 milionë italianë që jetojnë në kushtet e varfërisë, duke e bërë vendin e parë në Europë.

Por vlen të theksojmë në statistikat e Eurostat të varfër konsiderohen ata persona që nuk përballojnë dot shpenzimet e paparashikuara, që nuk sigurojnë dot ngrohje në të gjithë shtëpinë apo të kenë vetëm dy palë këpucë në vit.

Të gjitha këto të dhëna përbëjnë atë që quhet indeksi i ”privimeve sociale dhe materiale”, por që në thelb tregojnë varfërinë e një familjeje. Megjithëse ky fenomen është në tkurrje, në Bashkimin Europian janë ende 78,5 milionë persona që jetojnë në kushte të vështira.