“Mua tani më pret dorëheqja, por lufta sapo ka filluar”, Vuçiç përkulet para popullit: Nuk kemi lindur në kolltuk!

Presidenti i Serbisë, Aleksandar Vuçiç, iu drejtua qytetarëve të mbledhur përpara ndërtesës së Sekretariatit të Përgjithshëm të Presidencës, në kuadër të dorëheqjes së tij nga posti i presidentit.

Vuçiç mbërriti para Presidencës, ku u prit nga një numër i madh mbështetësish. Në fjalën e tij, Vuçiç falënderoi mbështetësit për mbështetjen gjatë viteve të presidencës dhe për dy fitoret në zgjedhjet presidenciale të vitit 2017 dhe 2022.

Presidenti serb deklaroi gjithashtu se gjatë viteve të fundit Serbia është përballur me presione të shumta dhe tha se ai kishte mbrojtur atë që e cilësoi si vlerat tradicionale dhe demokratike të shoqërisë serbe.

“Faleminderit pafundësisht, njerëz të guximshëm të Serbisë, që iu kundërvunë kësaj dhe thatë: ‘Jo, nuk e dorëzojmë atdheuntonë, jo, nuk e dorëzojmë Serbinë tonë’”, u shpreh ai.

Dorëheqja e Vuçiçit vjen pas një periudhe të gjatë protestash masive kundër qeverisë së tij. Protestat, të udhëhequra fillimisht nga studentët, nisën pas shembjes së një strehe në stacionin hekurudhor të Novi Sadit në nëntor 2024, ku humbën jetën 16 persona. Lëvizja u zgjerua më pas në një valë protestash mbarëkombëtare, me kërkesa për përgjegjësi, luftë kundër korrupsionit dhe zgjedhje të parakohshme.

Protestat kanë vazhduar edhe pas njoftimit të Vuçiçit për dorëheqjen. Në qershor, mijëra demonstrues u mblodhën në Kraljevo, ndërsa lëvizja studentore vijoi presionin ndaj pushtetit.

Ndërkohë, Vuçiç ka njoftuar se synon të kalojë në garën për postin e kryeministrit në zgjedhjet e parakohshme parlamentare të 25 tetorit.