Japonia shpalli sot gjendjen e jashtëzakonshme, kryeministri: Kriza më e madhe që nga paslufta

Kryeministri japonez, Shinzo Abe, të martën deklaroi gjendjen e jashtëzakonshme për të luftuar infeksionet e koronavirusit në qendrat kryesore të popullsisë dhe nxori një paketë stimulimi me gati 1 trilion dollarë për të zbutur goditjen ekonomike.

Gjendja e jashtëzakonshme do të zgjasë një muaj.

“Nuk është ekzagjerim të themi se ekonomia e Japonisë dhe ekonomia botërore po përballen me krizën më të madhe që nga paslufta. Ne do të mbrojmë punësimin dhe jetën me çdo kusht”, tha Abe në një konferencë për shtyp.

Abe shtoi se duke zvogëluar kontaktin midis njerëzve me 70% në 80%, qeveria shpresonte që infeksionet të arrinin kulmin në dy javë. Qeveria miratoi paketën stimuluese, me vlerë 108 trilionë jenë (990 miliardë dollarë). Kjo është e barabartë me 20% të prodhimit ekonomik të Japonisë, më shumë se 11% i PBB amerikane për paketën stimuluese të Presidentit Donald Trump dhe 5% të PBB për paketën e Gjermanisë.

Shpenzimet e drejtpërdrejta fiskale do të jenë 39.5 trilionë jen, më shumë se dyfishi i shumës që Japonia shpenzoi pas rënies ekonomike në vitin 2008.
Japonia e ka pasur nën kontroll shpërthimin e koronavirusit të ri deri tani, por një rritje e vazhdueshme e infeksioneve në Tokio, Osaka dhe zona të tjera çoi në thirrjen e një gjendjeje të jashtëzakonshme.

Infeksionet koronavirus në Tokio u dyfishuan në rreth 1,200 në pesë ditët e kaluara. Abe përmendi paralajmërimin e ekspertëve se me këtë ritëm infektimet mund të shkonin në 10,000 në dy javë dhe në 80,000 në një muaj.
Deklarata e fundit e emergjencave u jep qeveritarëve autorizimin që t’u kërkojnë njerëzve të qëndrojnë në shtëpi dhe bizneseve të mbyllen. Por nuk ka penalitete për injorimin e kërkesave në shumicën e rasteve dhe kërkesa do të mbështetet më shumë në respektimin e autoritetit.

Abe theksoi se nuk ishte një bllokim i rreptë, pasi shumica e bankave, supermarketeve dhe trenave do të funksionojnë si zakonisht.

Ndërkohë në Tokio, Guvernatorja Yuriko Koike siguroi banorët se nuk do të kishte kufizime në blerjen e sendeve ushqimore dhe ilaçeve. Por ajo u lut që ata të rrinin në shtëpi aq sa mundnin.

“Pa parandaluar përhapjen e sëmundjes infektive, nuk mund ta riktheni jetën”, tha ajo.

Edhe ministri i Bujqësisë, Pylltarisë dhe Peshkimit, Taku Eto, u bëri thirrje blerësve të jenë të qetë sepse “ka furnizim të mjaftueshëm me ushqime dhe nuk është planifikuar pezullim në fabrikat e ushqimit”.

Kufizimet duket se do të rëndojnë edhe vendin me ekonominë e tretë më të madhe në botë. Japonia do të shesë një shumë rekord të bonove shtesë me vlerë më shumë se 18 trilionë jenë për të financuar paketën e ndihmës, duke shtuar borxhin e madh që është dyfishi i madhësisë së ekonomisë së saj. Ndërsa stimuli mund të lehtësojë dëmtimin e menjëhershëm nga pandemia, ligjvënësit tashmë po kërkojnë shpenzime edhe më të mëdha për të parandaluar falimentimet dhe humbjet e vendeve të punës.