Kina duhet të përfshihet më shumë për hapjen e Ngushticës së Hormuzit

Shefi i marinës franceze, Nicolas Vaujour thotë se Kina duhet të angazhohet më drejtpërdrejt për të ndihmuar në rikthimin e qarkullimit në Ngushtica e Hormuzit, e cila mbetet e bllokuar për shkak të tensioneve në rajon.

Gjatë një konference sigurie në Paris, Vaujour tha se prania aktuale detare e Kinës nuk është e mjaftueshme për të garantuar rikthimin e trafikut normal në këtë korridor të rëndësishëm energjetik. Ai theksoi se ekziston një dialog politik mes autoriteteve kineze dhe iraniane për të lejuar kalimin e një numri të kufizuar anijesh, kjo nuk mjafton për të normalizuar situatën.

Sipas tij, Kina pritet të rrisë përfshirjen dhe të ushtrojë më shumë presion diplomatik, për të zgjidhur krizën dhe për të hapur plotësisht qarkullimin në një nga rrugët më të rëndësishme të tregtisë globale.