Kisha nën hetim, shet “vajin hyjnor” që “kuron” Covid-19

Çuditë në këtë kohë të pandemisë nuk kanë të sosur. Një kishë e vogël është vënë nën hetim për shitjen për rreth 100 dollarë të një shishe me ”vaj pastrues hyjnor” që sipas saj kuron Covid-19.

Mediet e huaja shkruajnë se kisha e Mbretërisë në Camberwell ka nisur shitjen e kësaj shisheje të vogël dhe një litari të kuq dhe deklaron se ato do të mbrojnë besimtarët nga virusi nëse e ziejnë atë në ujë të nxehtë apo lyejnë një peshqir me vajin dhe marrin frymë përmes tij.

Autoritetet për Standardet e Tregtisë kanë nisur menjëherë një hetim për këtë çështje por mediat raportojnë se kisha vazhdon ende shitjen e këtyre produkteve.

Peshkopi i kishës, Wiseman shkroi në një postim se njerëzit do të mbroheshin duke e mbuluar veten me vajin hyjnor të mbrojtjes nga murtaja dhe duke lidhur litarin e kuqe rreth trupit. ”Kjo është arsyeja pse unë dua t’ju inkurajoj, nëse nuk e keni bërë tashmë, për të marrë pajisjet tuaja të mbrojtjes hyjnore”.