Klimë në krizë: Gjigantët e ekonomisë po dështojnë premtimet e Parisit

Dhjetë vite pas Marrëveshjes historike të Parisit për klimën, shkencëtarët dhe organizatat mjedisore paralajmërojnë se bota është ende shumë larg arritjes së objektivave të vendosur.

Marrëveshja, e miratuar më 12 dhjetor 2015 nga gati 200 vende, angazhon shtetet të kufizojnë ngrohjen globale nën 2°C, dhe idealisht në 1.5°C mbi nivelet paraindustriale.

“Marrëveshja e Parisit ka mbetur një busull globale për politikën klimatike,” u shpreh Martin Kaiser, kreu i “Greenpeace Germany”.

“Kjo do të mbetet e vlefshme vetëm nëse ekonomitë e mëdha, veçanërisht vendet e G20, mbyllin hendekun mes ambicies dhe veprimit,” shtoi ai.

Sipas tij, qeveria gjermane nën kancelarin Friedrich Merz ka përgjegjësinë të drejtojë vendin drejt kursit të synuar prej 1.5 gradësh. “Mbrojtja e klimës nuk është një barrë, por themeli i lirisë, sigurisë dhe mirëqenies së së ardhmes,” tha Kaiser.

Ndërkohë, Johan Rockström, drejtor i Institutit të Potsdamit për Kërkime mbi Ndikimin e Klimës (PIK), kujtoi atmosferën optimiste të samitit të vitit 2015.

“Sot, një dekadë më vonë, duhet të pranojmë se kemi dështuar deri tani,” tha ai.