Komandant i ri për luftën në Ukrainë, zbulohet synimi i Putinit

Një gjeneral i ri për të drejtuar luftën në Ukrainë, është emëruar nga Presidenti rus Vladimir Putin. Ushtria ruse ka ndryshuar planet pas dështimit për të marrë Kievin dhe këtë e kërkon nga Alexander Dvornikov.

Lufta për rusët po shkon keq ndaj ata duhet të bëjnë diçka ndryshe, ndaj paralajmërimet për një sulm të mundshëm në rajonin e Donbasit, duken gjithnjë e më të afërta.

Dvornikov, 60-vjeç, ishte komandanti i parë i operacioneve ushtarake të Rusisë në Siri, pasi Putin dërgoi trupa atje në shtator 2015 për të mbështetur qeverinë e presidentit sirian Bashar al-Assad.

Forcat ruse kanë përdorur një qasje të ngjashme të ashpër në pjesë të Ukrainës, duke goditur ndërtesat e banimit në qytetet kryesore dhe duke shkatërruar pjesën më të madhe të qytetit port ukrainas të Mariupolit.