Kriza e refugjatëve, Erdogan shkon në Bruksel

Presidenti turk, Rexhep Taip Erdogan, do të shkojë në Bruksel këtë të hënë për një vizitë pune, pas konfliktit që u krijua midis BE-së dhe Turqisë në lidhje me refugjatët. Me mijëra u mblodhën në kufi, pasi Turqia tha javën e shkuar se nk do t’i pengonin më që të kalonin në territorin e BE-së. Greqia dërgoi policinë në kufi dhe u përpoq të pengonte hyrjen e refugjatëve në vendin e tyre, si nga deti ashtu dhe nga toka.

Zyra e Erdoganit nuk e specifikoi se cilin do të takonte presidenti turk të hënën e 9 Marsit, por Brukseli është kryeqyteti i BE-së. Njoftimi erdhi pak minuta pasi ministrat e jashtëm të BE-së u takuan në Kroaci, ku qortuan Turqinë për qëndrimin e mbajtur deri tani. Europa është alarmuar nga vendimi i Erdoganit për të mos i penguar më refugjatët, në një kohë kur Turqia është duke streuar rreth 4 milionë të tillë.

Presidenti turk i ka kërkuar BE-së që të mbajë më shumë nga barra e refugjatëve, por BE-ja këmbëngul që Turqia duhet t’i bindet marrëveshjes së vitit 2016, ku Ankaraja zotohet të strehojë refugjatët në këmim të fondeve që shkojnë në miliarda dollarë. Erdogani i tha kancelares Angela Merkel, në një bisedë telefonike të mbajtur këtë të premte, që marrëveshja Turqi-BE nuk po funksionon më dhe ka nevojë për modifikime.