Kryeministri portugez António Costa dha dorëheqjen pasi hetuesit kontrolluan rezidencën e tij zyrtare në një hetim për korrupsion të dyshuar.
Ai tha se nuk ishte emëruar si i dyshuar, por besonte se hetimi ishte i papajtueshëm me qëndrimin në detyrë.
Prokurorët thanë të martën se po hetonin koncesionet e dhëna për minierat e litiumit dhe prodhimin e hidrogjenit.
Ata thanë se urdhër-arrest ishin lëshuar për pesë persona duke përfshirë shefin e shtabit të z. Costa, Vitor Escária.
Gazeta “Publico” raportoi se Escaria ishte arrestuar.
Ministri i Infrastrukturës João Galamba ndërkohë është paditur si pjesë e hetimit për marrëveshjet e energjisë.
“Dinjiteti i funksioneve të kryeministrit nuk përputhet me asnjë dyshim për integritetin e tij, sjelljen e tij të mirë dhe aq më pak me dyshimin për praktikimin e ndonjë vepre penale”, tha kryeministri në një fjalim televiziv të martën.
Costa tha se ai u kap në befasi nga hetimi i korrupsionit, por premtoi se do të bashkëpunonte me të.
“Nuk ka asnjë akt të paligjshëm që rëndon mbi ndërgjegjen time, apo edhe ndonjë akt të censurueshëm”, shtoi ai.
Presidenti Marcelo Rebelo de Sousa tha se ai kishte pranuar dorëheqjen e kryeministrit dhe thirri partitë politike për konsultime të mërkurën.
Kriza politike u shpalos pasi prokurorët publikuan një deklaratë duke detajuar kontrollet në më shumë se 40 ambiente të ndryshme si pjesë e hetimit.
Prokurorët po hetojnë korrupsionin e dyshuar dhe shitjen e ndikimit në koncesionet e minierave të litiumit në Portugalinë veriore, si dhe një projekt të prodhimit të hidrogjenit dhe ndërtimin e planifikuar të një qendre të dhënash në portin me ujë të thellë të Sines, në jug të Lisbonës.
Rreth 140 detektivë kontrolluan 17 prona banimi dhe 25 ambiente të tjera, përfshirë zyrën e shefit të kabinetit të kryeministrit dhe dy ministri të qeverisë.
Ata kontrolluan gjithashtu zyrat komunale në Sines.
Indeksi kryesor i aksioneve të Portugalisë PSI 20 ra pothuajse 3% ndërsa u shpalos kriza politike.
Bashkimi Evropian është i prirur të zvogëlojë varësinë e tij nga minierat në Kinë, Afrikë dhe Amerikën e Jugut për litium dhe lëndë të tjera të para të nevojshme për tranzicionin e energjisë së gjelbër.
Rezervat e litiumit të Portugalisë konsiderohen qendrore për kërkesën në rritje të Evropës për makina elektrike, por projektet e eksplorimit janë përballur me kundërshtime nga disa vendas.