Kryeministri Sanchez i qëndron besnik vendimit për t’u përjashtuar nga shpenzimet e NATO-s

Kryeministri spanjoll Pedro Sanchez u largua nga samiti i NATO-s, me një përjashtim nga shpenzimet më të mëdha për mbrojtjen. Ai u largua me kërcënime për tarifa të reja nga presidenti i SHBA-së, Donald Trump, sipas AP. Udhëheqësi progresiv spanjoll i ka qëndruar vendimit te tij për t’u përjashtuar nga shpenzimet e mbrojtjes së NATO-s.

Në një reagim ndaj deklaratës së Trump, kryeministri spanjoll Sanchez theksoi se ishte Komisioni Evropian dhe jo Spanja që vendoste për politikën tregtare të bllokut. “Ajo që është e qartë është se politika tregtare është një politikë e drejtuar nga këtu, nga Brukseli”, tha Sanchez. Në samitin e aleancës ushtarake, anëtarët ranë dakord për rritjen e shpenzimeve të mbrojtjes në 5% të PBB-së.

Sanchez njoftoi një përjashtim në minutën e fundit, duke thënë se Spanja do të shpenzonte vetëm deri në 2,1%, të cilën ai e quajti të mjaftueshme dhe realiste. “Ata duan më shumë avantazhe, por do të duhet të na e shlyejnë atë në tregti sepse unë nuk do ta lejoj këtë të ndodhë. Është e padrejtë”, tha presidenti Trump duke kritikuar Spanjën pas samitit. “Nuk është gjithmonë e lehtë të interpretosh saktësisht se çfarë do të thotë Trump”, u tha kryeministri belg, Bart De Wever gazetarëve në samitin e BE-së.

“Mënyra se si ai dëshiron të vendosë tarifa importi ndaj Spanjës veçmas është një mister për të gjithë. A mund të prekë kjo produkte specifike nga Spanja? Do të duhet të presim dhe të shohim”, tha ai. Lëvizja e Spanjës në skenën ndërkombëtare vjen në një moment kompleks për Sanchez pasi rastet e korrupsionit që përfshijnë rrethin e tij të ngushtë kanë zënë në kurth partinë e tij Socialiste dhe kanë rezultuar në thirrje më të forta madje edhe nga disa aleatë të majtë për të shpallur zgjedhje të parakohshme. Deri më tani, Sanchez ka refuzuar.

“Ndërsa Spanja është nën ombrellën e Bashkimit Evropian – i cili negocion marrëveshje tregtare në emër të të 27 vendeve anëtare ajo ende mund të jetë në shënjestër të tarifave që godasin industritë e saj më të cenueshme”, tha Antonio Garamendi, president i Konfederatës Spanjolle të Organizatave të Biznesit.