Ky është vrasesi i Australisë, Naveed Akram që akuzohet për 15 vrasje dhe terrorizëm

Sulmuesi i dyshuar i Bondi-t, i cili i mbijetoi një shkëmbimi zjarri me policinë, është akuzuar me 59 vepra penale, përfshirë 15 akuza për vrasje dhe një akuzë për kryerjen e një akti terrorist, në atë që hetuesit dyshojnë se mund të jetë “fryrë nga ISIS”. Naveed Akram, 24 vjeç, u akuzua nga policia e Uellsit të Ri Jugor të mërkurën, pasi u arrestua në vendngjarje dhe u dërgua në një spital të Sidneit me lëndime kritike të dielën mbrëma.

Policia deklaroi se “do të pretendojë në gjykatë se burri u përfshi në sjellje që shkaktoi vdekje, lëndime të rënda dhe rrezikoi jetën për të avancuar një kauzë fetare dhe për të shkaktuar frikë në komunitet”. Indikacionet e hershme sugjerojnë një sulm terrorist të frymëzuar nga ISIS, një organizatë terroriste e listuar në Australi. Pas hetimeve të gjera në kuadër të Operacionit Arques, hetuesit shkuan në spital ku akuzuan 24-vjeçarin nga Bonnyrigg me 59 vepra penale.

Akram u akuzua pasi u zgjua nga koma të martën, me çështjen e dëgjuar në gjykatë të mërkurën pasdite. Ai nuk kërkoi lirimin me kusht dhe do të paraqitet sërish në gjykatë më 8 prill. Ndër akuzat kundër tij janë 40 akuza për plagosje me qëllim vrasjeje, një akuzë për vendosjen e një eksplozivi në ose pranë një ndërtese, një akuzë për shkrepje arme zjarri me qëllim shkaktimin e dëmtimit të rëndë trupor dhe një akuzë për shfaqjen publike të një simboli terrorist.

Akram dhe babai i tij, Sajid Akram, 50 vjeç, dyshohet se kishin hapur zjarr ndaj atyre që merrnin pjesë në një ngjarje për të shënuar fillimin e festivalit tetë-ditor të Hanukah-s në plazhin Bondi të dielën. Policia ka thënë se Sajid – i cili u qëllua për vdekje nga oficerët në vendngjarje – i kishte marrë ligjërisht armët e përdorura në sulm. Të shtënat masive rezultuan në vrasjen e 15 personave nga sulmuesit e dyshuar, përfshirë një fëmijë 10-vjeçar. 20 persona të tjerë mbetën në spital me lëndime të mërkurën. Incidenti u shpall një ngjarje terroriste të dielën mbrëma, një ditë pasi kryeministri australian, Anthony Albanese, tha se sulmi i së dielës dukej se ishte frymëzuar nga Shteti Islamik.