Le Pen nis fushatën elektorale

Vetëm një ditë pas vendimit të gjykatës dhe deklaratës se synon të garojë në zgjedhjet e ardhshme presidenciale në Francë, Marine Le Pen ka dhënë shenjat e para të fushatës së saj. Gjatë ditës së sotme, ajo publikoi në rrjetet sociale një poster me sloganin “Për Francën”, të shoqëruar me mesazhin për “Rilindjen” e vendit. Ky slogan është interpretuar edhe si një sfidë politike ndaj presidentit Emmanuel Macron, pasi lidhet me emrin e lëvizjes së tij politike.

Prej vitesh, Le Pen e ka ndërtuar profilin e saj politik si kundërshtare e elitave dhe establishmentit, duke u paraqitur si zëri i qytetarëve të zakonshëm. Edhe pse është mposhtur dy herë nga Macron në zgjedhjet presidenciale, ajo mbetet një nga figurat më të fuqishme të skenës politike franceze dhe kryeson në disa sondazhe.

Vendimi i fundit i gjykatës i hapi rrugën kandidimit të saj, pasi u hoq kufizimi për mbajtjen e posteve publike. Megjithatë, Le Pen u dënua me një vit mbikëqyrje elektronike. Politikania franceze ka bërë të ditur se do ta ankimojë vendimin në Gjykatën e Kasacionit dhe ka deklaruar se nuk do të vendosë byzylykun elektronik derisa të ketë një vendim përfundimtar.

Ecuria e procesit gjyqësor mund të ndikojë edhe në garën presidenciale. Nëse procedurat zgjasin, Le Pen mund të zgjidhet presidente përpara mbylljes së çështjes, duke përfituar nga imuniteti presidencial. Në të kundërt, nëse gjykata e përshpejton shqyrtimin e dosjes, detyrimi për të mbajtur byzylykun elektronik gjatë fushatës mund të ndikojë negativisht në imazhin e saj.