Libi: Djali i Gadhafit u vra me armë zjarri

Zyrtarë libianë njoftuan të mërkurën se Seif al-Islam Gadhafi, djali i ish-udhëheqësit të fuqishëm libian Moammar Gadhafi, u vra me armë zjarri në rezidencën e tij në qytetin perëndimor libian të Zintanit. Seif besohet se po kërkonte një kthim në jetën publike në një vend ende thellësisht të ndarë mes qeverive rivale dhe grupeve të armatosura.

Ai ishte djali i dytë më i madh i sundimtarit të ndjerë të Libisë, Moammar Gadhafi, i cili qeverisi vendin për më shumë se katër dekada. Para rrëzimit të babait të tij në vitin 2011, Seif al-Islam ishte lidhur me përpjekjet për të promovuar reforma të kufizuara politike dhe ekonomike. Megjithatë, gjatë kryengritjes së vitit 2011, ai mbështeti publikisht shtypjen e dhunshme të protestave nga qeveria.

Zyra politike e Seif al-Islam ka deklaruar se katër burra të maskuar sulmuan rezidencën e tij në Zintan dhe e vranë atë, duke e përshkruar aktin si “të pabesë dhe frikacak”. Avokati i tij, Khaled al-Zaidi, ka konfirmuar se ai u vra në shtëpinë e tij. Kanali televiziv al-Arabiya raportoi se 53-vjeçari u qëllua për vdekje në kopshtin e rezidencës së tij, duke cituar burime pranë familjes Gadhafi.

Spekulimet pas vrasjes janë përqendruar te milicitë pranë qeverisë së kryeministrit Abdul Hamid Dbeibeh me qendër në Tripoli. Një deklaratë nga një milici e lidhur me ministrinë i hodhi poshtë këto akuza si të rreme. Përpjekja e ripërtërirë e Seifit për t’u kthyer në jetën politike ishte një lëvizje që mund të kishte sfiduar Dbeibeh dhe aleatët e tij. Zyra politike e Gadhafit i bëri thirrje gjyqësorit libian, komunitetit ndërkombëtar, Kombeve të Bashkuara dhe organizatave të të drejtave të njeriut të nisin një hetim të pavarur dhe transparent në nivel lokal dhe ndërkombëtar.