Masakra në Nigeri, ushtria gjen 70 trupa të dekompozuar

Ushtria nigeriane ka gjetur 70 trupa të pajetë në Damasak, pas çlirimit të qytetit nga pushtimi i militantëve të grupit terrorist Boko Haram. Trupat janë të dekompozuar thuajse të gjithë, dhe shumica janë të masakruar.

Nga imazhet zona duket si vend ekzekutimi i grupit islamik. Autoritetet thonë se pas vrasjes militantët i kanë hedhur poshtë një ure në një nga rrugët kryesore jashtë qytetit të 70 viktimat. Disa prej tyre i kishin kokat e prera plotësisht

Sipas një vëzhgimi të parë të trupave, kuptohet se vrasja është kryer kohë më parë, edhe pse ajri i thatë i shkretëtirës mund të dekompozojë më lehtësisht trupat e pajetë.

Boko Haram ka vrarë mijëra njerëz në 6 vjet kryengritje të tyre, me qëllim krijimin e kalifatit islamik në verilindje të Nigerisë.

Qyteti i Damasak u pushtua prej tyre në nëntor të 2014, por është marrë nën kontrollin e autoritetve me ndihmën e ushtrisë së cadit të shtunën e shkuar.

Të enjten Boko Haram ekzekutoi 10 persona në qytetin e Gamburu, në kufi me Kamerunin, për të demonstruar forcën e tyre ndaj civilëve të pambrojtur dhe për të shkaktuar largimin e tyre.

Presidenti i vendit Goodluck Jonathan është kritikuar se nuk ka bërë sa duhet për të luftuar grupin vrasës.