Mbyllet qeveria federale në SHBA, çfarë do të thotë kjo?

Qeveria federale amerikane është zyrtarisht e mbyllur që nga mesnata e së mërkurës, pasi Kongresi nuk arriti të miratojë një marrëveshje për financimin e departamenteve dhe agjencive shtetërore.

Kriza erdhi pas mosmarrëveshjeve të forta mes demokratëve dhe republikanëve. Demokratët refuzuan të mbështesin planin e shumicës republikane, që kontrollon si Senatin ashtu edhe Dhomën e Përfaqësuesve, duke kërkuar lëshime të rëndësishme në politikat e kujdesit shëndetësor. GOP hodhi poshtë këto kërkesa, duke bllokuar çdo kompromis në momentet e fundit.

Ky është mbyllja e parë e qeverisë amerikane që nga dhjetori 2018, kur kriza e financimit zgjati 35 ditë gjatë mandatit të parë të Donald Trump. Situata e tanishme vjen në një kohë kur demokratët ndodhen në pakicë në të dyja dhomat e Kongresit, pas rizgjedhjes së Trump vitin e kaluar.

Lideri i shumicës demokrate në Senat, Chuck Schumer, akuzoi republikanët për bllokimin e qëllimshëm të procesit: “Republikanët po e zhytin Amerikën në një mbyllje, duke refuzuar bisedimet dypartiake dhe duke rrezikuar kujdesin shëndetësor të miliona qytetarëve”, tha ai.

Muajin e kaluar, republikanët miratuan në Dhomën e Përfaqësuesve një projektligj për ta mbajtur qeverinë të financuar deri më 21 nëntor, por ai kërkonte mbështetjen e disa demokratëve për të kaluar pragun prej 60 votash në Senat. Votimet e së martës treguan se kjo mbështetje nuk u sigurua, ndërsa edhe propozimi alternativ i demokratëve për një financim të përkohshëm deri në tetor u bllokua nga republikanët.

Çfarë do të thotë kjo për qytetarët?

Mbyllja e qeverisë nënkupton se mijëra punonjës federalë do të dërgohen përkohësisht në pushim të detyruar, shërbime të ndryshme publike do të kufizohen, ndërsa agjencitë e sigurisë, ushtria dhe shërbimet thelbësore do të vijojnë punën. Ekspertët paralajmërojnë se, nëse kriza zgjat, pasojat do të ndihen në ekonomi, në shërbimet sociale dhe në tregjet financiare.