Me buzëqeshje të ngrohtë e buqetë me lule, si e priti Putin kancelaren Merkel

Presidenti rus Vladimir Putin ka mirëpritur në banesën e tij në Soçi kancelaren gjermane Angela Merkel, duke i dhuruar një buqetë me lule në verandë.

Videoja e takimit tregon udhëheqësin rus duke përshëndetur delegacionin gjerman në krye të shkallëve që çojnë në hyrjen e banesës.

Ai shtrëngoi duart me Angela Merkel para se t’i dhuronte një buqetë të madhe me lule të bardha dhe rozë, para se ta ftonte atë brenda.

Presidenti rus ka një reputacion për gjeste të ndjeshme ndaj njerëzve me të cilët takohet. Në vitin 2014, ai i vendosi një shall mbi supet e Zonjës së Parë të Kinës Peng Liyuan gjatë samitit të APEC në Pekin.

Më parë këtë muaj, ai shmangi një goditje të imazhit të tij publik, teksa rojet e sigurisë u përpoqën të largonin me dhunë një veteran të luftës që po përpiqej t’i afrohej Putinit gjatë marshimit për përkujtimin e ditës së fitores kundër nazistëve.