Meta në krizë! Zuckerberg pushon nga puna më shumë se 11 mijë punonjës

Kompania Meta, që është në pronësi të Mark Zuckerberg po pushon nga puna 13% të stafit të saj ose më shumë se 11 mijë punonjës. Zuckerberg iu ka dërguar një letër punonjëve ditën e sotme ku bën të ditur vendimin.

“Sot po ndaj disa nga ndryshimet më të vështira që kemi bërë në historinë e Metës. Kam vendosur të zvogëloj ekipin tonë me rreth 13% dhe të lë të largohen më shumë se 11,000 nga punonjësit tanë të talentuar”, thuhet në letrën e Zuckerberg.

Pushimet nga puna vijnë në një kohë të vështirë për Metën, me aksionet e saj të cilat kanë rënë në 20%.

Meta po investon shumë në metaverse, i cili i referohet një bote dixhitale ende të pazhvilluar. Ky bast i rëndë i ka kushtuar Metës rreth 9.4 miliardë dollarë deri më tani, dhe kompania parashikon që humbjet do të rriten ndjeshëm nga viti në vit.