Milioneri amerikan pranon tre vrasje në dokumentarin për jetën e tij

Robert Durst, pjestar i një prej familjeve më të pasura të Nju Jorkut, është arrestuar pasi dyshohet të ketë vrarë tre vetë, përfshi edhe gruan e tij të parë.
Urdhri i arrestit nga policia e Los Anxhelesit erdhi pas një videoregjistrimi në të cilit dukej se Durst pranonte tre vrasjet.
Video u shfaq në serinë e fundit të një dokumentari transmetuar të dielën nga rrjeti televiziv amerikan, “HBO”, titulluar “Tersi: Jeta dhe vdekjet e Robert Durst”.
Sipas autorëve të dokumentarit, Durst shkoi në tualet pas intervistës dhe ndërsa kishte ende mikrofonin ndezur pëshpëriti me vete: “Çfarë dreqin kam bërë?! Sigurisht që i kam vrarë të gjithë!”
Durst është akuzuar fillimisht për zhdukjen e bashkëshortes së tij të parë në vitin 1982, si dhe për vrasjen e një mikeshe në vitin 2000, por në të dy rastet ka arritur të mos dënohet.
Në vitin 2001, 71-vjeçari gjithashtu arriti të bindte një juri se ishte i pafajshëm, pasi akuzohej se kur jetonte në Teksas, i maskuar si një femër memece, kishte qëlluar për vdekje dhe copëtuar trupin e fiqnjit të tij të moshuar, Morris Bllek, por e kishte bërë këtë për vetëmbrojtje.
Familja e Durst, që besohet se ka një pasuri me vlerë 4 miliardë dollarë, përmes një deklarate falenderoi të gjithë ata që kishin marrë pjesë në arrestimin e tij.
“Shpresojmë që më në fund ai të japë llogari për gjithçka ka bërë”, tha vëllai i tij Daglas.
Nën administrimin e Perandorisë “Durst”, përveç 11 qiellgërvishtësve është edhe Qendra Tregtare Botërore 1, e ngritur në vendin ku ndodheshin kullat binjake para 11 shtatorit.
Në vitin 2006, Durst i kishte shkëputur të gjitha lidhjet me familjen, duke pranuar një kompensim prej 65 milionë dollarësh.