Miratimi i kredive në Eurozonë – BQE: Lehtësohet për të gjitha kategoritë në tremujorin e tretë

Bankat në zonën euro kanë lehtësuar standardet e kreditit në tremujorin e tretë dhe pritet të mos i ndryshojnë në pjesën e mbetur të vitit, sipas një sondazhi të Bankës Qendrore Europiane, rezultati i të cilit ul shqetësimet e politikëbërësve.

Përballë ngadalësimit ekonomik dhe rrezikut të recesionit, institucioni ka miratuar stimuj monetarë, në përpjekje për të nxitur huadhënien drejt ekonomisë reale. Standardet e kreditit, apo kushtet e bankave për miratimin e kredive janë lehtësuar në tremujorin e tretë, si për kreditë e bizneseve ashtu edhe për ato hipotekore, tregon sondazhi.

“Për tremujorin e katërt, standardet e kreditit pritet të qëndrojnë të pandryshuara në të gjithë kategoritë e kredive”, deklaron BQE. Ekzekutivët e bankave janë ankuar prej kohësh ndaj normave negative të interesit.

Megjithatë, sondazhi i Bankës Qendrore Europiane ndaj 144 bankave të eurozonës, tregoi se norma negative e interesit për depozitat ka kontribuar në rritjen e volumit të huasë tek të gjithë kategoritë.   Në lidhje me kërkesën, bankat presin një rritje për kredit hipotekore dhe konsumatore.