Nëse dini gjuhën, në Danimarkë mund të fitoni azil

Danimarka paralajmëron emigrantët dhe refugjatët potencialë për ashpërsim masash.

Në reklamat e vendosura së fundmi, në disa gazeta libaneze, tre arabe dhe në një të përditshme në anglisht, shteti danez tregon kushtet shtesë për të përfituar leje-qëndrimi.

Reklamat tregojnë se Danimarka i ka shtrënguar masat ndaj emigrantëve, sikundër edhe ka përgjysmuar përfitimet sociale për refugjatët që kanë mbërritur së fundmi. Po ashtu, ribashkimi familjar për ata që kanë leje të përkohshme qëndrimi atje nuk mund të bëhet gjatë vitit të parë të qëndrimit.

Përmes këtyre reklamave, ata që duan të emigrojnë për azil në Danimarkë, qartësohen se do t’u kërkohet të flasin dhe të kuptojnë gjuhën daneze, si kusht për të siguruar lejen e qëndrimit.

Njëherësh, ato paralajmërojnë se të gjithë ata, të cilëve iu është refuzuar azili, duhet të largohen menjëherë nga Danimarka.