Ndarja më e madhe që prej 1 mijë vitesh: Kisha Ruse ndahet nga Konstandinopoja

Kisha Ortodokse Ruse shkëputi lidhjet me Sinodin e Shenjtë të Patriarkanës së Konstandinopojës, udhëheqjes mbarëbotërore të krishtërimit ortodoks, në përgjigje të një vendimi të javës së kaluar, me të cilin Konstandinopoja i dha pavarësinë Kishës Ortodokse të Ukrainës.

Veprimi i Kishës Ortodokse Ruse, e cila numëron pothuajse gjysmën e të gjithë besimtarëve ortodoksë në mbarë botën, konsiderohet si përçarja më e rëndë mes krishterëve në 1000 vjet që nga viti 1054, kur u shënua ndarja e ortodoksizmit lindor nga katolicizmi.

“Anëtarët e Sinodit të Shenjtë e shohin të pamundur vazhdimin e qëndrimit në bashkësinë eukaristike me Patriarkanën e Konstandinopojës”, thuhet në një deklaratë të kishës ortodokse.

Rruga drejt pavarësisë, “autoqefalia” në terma kanonikë, e kishës ukrainase, ka shërbyer si një shoqëruese e aksioneve për konfliktin ushtarak që ka vijuar mes Rusisë dhe Ukrainës.

Në vendimin e javës së kaluar, Kostandinopoja jo vetëm që dha pavarësinë, por edhe riktheu priftërinjtë, peshkopët dhe anëtarët e kishës që ishin çkishëruar nga Moska.

Moska e ka mbajtur nën kontroll kishën ukrainase për 332 vjet me anë të një autorizimi sinodal të lëshuar në vitin 1686. Vendimi i javës së kaluar e revokoi këtë autorizim.

Kisha Ortodokse Ruse pretendon se nuk ka asnjë argument për përmbysjen e vendimeve të vjetra që kanë afirmuar për tre shekuj kontrollin e Moskës mbi kishën ukrainase.

Midis të tjerash, në deklaratën e kishës ruse theksohet se Konstandinopoja nuk kishte të drejtë të revokonte ish-komunikimet e ukrainasve nga Moska, duke përfshirë udhëheqësin e kishës ukrainase, Patriarkun Filaret, i cili është akuzuar nga Moska për tradhti.