Ish-presidenti i Finlandës, Sauli Niinistö, ka deklaruar se tensionet e krijuara rreth Grenlandës nuk duhet të lejohen të çojnë në dobësimin apo shkatërrimin e NATO-s, duke paralajmëruar për pasojat serioze që do të kishte një përçarje brenda aleancës.
“Askush nuk mund ta kishte imagjinuar që anëtari kryesor i NATO-s do të kërcënonte pushtimin e territorit të një vendi tjetër anëtar”, tha Niinistö në një intervistë për transmetuesin finlandez MTV, duke iu referuar deklaratave të përsëritura të presidentit të SHBA-së, Donald Trump, se Shtetet e Bashkuara duhet të aneksojnë Grenlandën, territor gjysmë-autonom i Danimarkës.
Niinistö, i cili mbikëqyri procesin e anëtarësimit të Finlandës në NATO përpara se të largohej nga detyra vitin e kaluar, theksoi se edhe nëse Uashingtoni ndjek një politikë më agresive ndaj Grenlandës, aleanca duhet të ruajë unitetin e saj. Sipas tij, Evropa duhet të marrë më shumë përgjegjësi për sigurinë kolektive.
“Duhet të mendojmë për një NATO më evropiane ose të blejmë kohë me shpresën se situata politike në SHBA do të ndryshojë”, u shpreh ai.
Trump ka deklaruar së fundmi se SHBA-të “kanë nevojë për Grenlandën” për arsye strategjike dhe nuk e ka përjashtuar përdorimin e forcës ushtarake. Këto qëndrime kanë rritur shqetësimet në Evropë, veçanërisht në vendet nordike.
Zyrtarë nga Danimarka dhe Grenlanda vizituan këtë javë Shtëpinë e Bardhë për të qetësuar situatën, por presidenti amerikan e mbajti të pandryshuar qëndrimin e tij. Niinistö paralajmëroi se çdo veprim ushtarak kundër Grenlandës mund të aktivizojë klauzolën e ndihmës së ndërsjellë të Bashkimit Evropian sipas Traktatit të Lisbonës.
Aktualisht, ai kryeson një grup pune që po përgatit një raport mbi mënyrat se si Evropa mund të garantojë mbrojtjen e saj pa mbështetjen e SHBA-së. Studimi, që pritet të publikohet në mars nga CEPS në Bruksel, do të shqyrtojë edhe mundësinë e krijimit të një force të përbashkët ushtarake evropiane.