Një foshnje vetëm 37-ditëshe humb jetën nga Covid-19

Një foshnje vetëm 37 ditëshe humbi jetën si pasojë e Covid-19 në Greqi. ”Fatkeqësisht ne sot kemi viktimën më të re të pandemisë, një foshnje që kaloi 17 nga gjithsej 37 ditët e saj, duke luftuar me virusin”, tha kryeministri Kyriakos Mitsotakis.

Ministria e Shëndetësisë, bëri me dije se foshnja e seksit mashkull, ishte dërguar në spitalin e fëmijëve në athinë në mes të shkurtit me një inflamacion nazal dhe ethe dhe ishte vënë në kujdes intensiv një ditë më pas. Ai u nda nga jeta të dielën.

Rreth 6800 persona kanë humbur jetën për shkak të Covid-19 në Greqi ndërsa rreth 480 të tjerë janë aktualisht në kujdes intensiv. Ministria kërkoi javën e shkuar ndihmë nga spitalet private pasi pranoi se sistemi i shëndetit publik në Athinë ishte nën një presion të papërballueshëm.