Një muaj luftë me COVID-19, Spanja shënon bilanc pozitiv për 24 orë

Pas më shumë se një muaji në luftë me COVID-19, Spanja shënoi ditën e sotme bilancin më pozitiv për sa i përket numrit të viktimave në 24 orë.

Këtë të dielë u raportuan për 288 viktima nga Ministria e Shëndetësisë, një bilanc që sërish mbetet i lartë, por në krahasim me situatën përpara një muaji vihet re një ulje e ndjeshme.

Që prej 18 marsit, në Spanjë nuk raportoheshin nën 300 viktima në ditë nga koronavirusi. Në total në të gjithë vendin janë regjistruar 23,190 të vdekur.

Drejtori i emergjencave shëndetësore, Fernando Simon paralajmëron qytetarët për të qëndruar vigjilent pavarësisht shifrave në ulje.

Ai shprehet se gjatë fundjavës mund të ketë edhe gabime në regjistrimin e bilancit pasi edhe administratat dhe mjekët punojnë me numër të kufizuar.

Në të gjithë vendin gjatë 24 orëve janë regjistruar 1,729 raste të reja duke e çuar numrin total të të infektuarve në mbi 225 mijë.

Lajm i mirë vjen në rradhët e qytetarëve të shëruar teksa gjatë kësaj periudhe kohore 3,024 persona kanë lënë spitalet dhe gjithsej janë shënuar 98,732 të shëruar.