Në një kohë që pandemia e Covid-19 është në pikun e saj në të gjithë botën, duket se diçka pozitive po ndodh dhe lidhet me ndaljen e luftërave. Nga Jemeni në Siri, për të vazhduar në Kamerun dhe Filipine, rebelët dhe ushtritë e këtyre shteteve i janë përgjigjur apelit të Sekretarit të Përgjithshëm të Organizatës së Kombeve të Bashkuara, Antonio Guterres.
Nga ana tjetër, apeli i sekretarit të OKB, Guterres është dëgjuar. Kërkesa për të shmangur luftën në këtë periudhë pandemie lidhej me mbrojtjen e civilëve në zonat e konfliktit, të cilët mes bombave dhe plumbave të kallashnikovëve, do të ishin shumë të ekspozuar ndaj Covid-19.
Kjo ndodhi në Jemen, vend i gjunjëzuar nga lufta 5-vjeçare. Njësoj vepruan rebelët dhe ushtria në Kamerun, si edhe Partia Komuniste në Filipine. Edhe forcat demokratike siriane e mbështetën armëpushimin, me OKB-në që i ka kërkuar edhe qeverisë të bëjë të njëjtën. Shpresa është se ndërprerja e luftës prej pandemisë do të shërbejë si shembull për të gjithë botën.
