Paralajmërimi i Bill Gates për Nju-Jork Tajms: IA-i përbën një kërcënim serioz për tregun e punës dhe për përditshmërinë e njerëzve

Themeluesi i Microsoft, Bill Gates, ka lëshuar një alarm të fortë mbi rreziqet që mbart zhvillimi i hovshëm i inteligjencës artificiale (IA). Në një intervistë ekskluzive për gazetën The New York Times, Gates nënvizoi se IA përbën një kërcënim serioz për tregun e punës dhe për përditshmërinë e njerëzve, duke e cilësuar adresimin e këtyre rreziqeve si “prioritetin kryesor për botën”.

Gjatë intervistës, ai bëri një krahasim me krizën historike ekonomike të shekullit të kaluar.

“Në vitin 1933, gjatë Depresionit të Madh, papunësia në Shtetet e Bashkuara arriti në 25 për qind. IA mund të mos i arrijë ato nivele, por ndikimi i saj nuk do të shterojë në një cikël të vetëm ekonomik.”, tha Bill Gates

Sipas filantropit amerikan, gjigantët e teknologjisë po i minimizojnë publikisht kërcënimet e inteligjencës artificiale për të mos cenuar investimet marramendëse financiare që po derdhen në këtë sektor.

“Privatisht, ata që e kuptojnë se sa shumë po përmirësohet kjo teknologji janë shumë të shqetësuar. Tani po i thonë njëri-tjetrit: ‘Mos e thuaj, po na dëmton. Bëhet fjalë për miliarda dollarë që po përpiqemi të mbledhim’,” zbuloi Gates.

Gates shpjegoi se alarmi i tij bazohet në faktin se aftësitë e IA-së i kanë tejkaluar parashikimet e tij fillestare. Ai kritikoi industrinë teknologjike për shmangien e skenarëve kritikë — përfshirë rrezikun e humbjes së kontrollit mbi modelet e IA-së nga vetë krijuesit e tyre — rrethana që në të kaluarën do të kishin nxitur më shumë maturi e vetëpërmbajtje.