Parlamentarët francezë, një tjetër vizitë në Krime

Sipas deputetit Jacques Myard, vizita e dytë e delegacionit parlamentar në Krime synon tërheqjen e vëmendjes së Evropës tek domosdoshmëria e heqjes së sanksioneve antiruse.

“Besoj se është e nevojshme të theksojmë e të nënvizojmë rëndësinë e heqjes së sanksioneve… Ato janë kundërproduktive dhe bien ndesh me interesat tona, me interesat e Rusisë, interesat e Francës dhe interesat e Evropës. Prandaj jemi sërish këtu, i pëlqen kjo dikujt apo jo”, është shprehur Myard.

Ndërsa lidhur me situatën e tanishme me komunitetin tartar në Krime, Thierry Mariani në fjalën e tij gjatë konferencës për shtyp ka vënë në dukje faktin se “të drejtat e tartarëve në Krime po respektohen më mirë sesa të drejtat e minoritetit rus në vendet Baltike”.

Gjithashtu, deputeti francez ka theksuar se Republika e Krimesë ka tri gjuhë zyrtare, përfshirë këtu edhe atë tartare. Teksa projekte të lançuara më parë për të zgjidhur problemet e popullsisë tartare janë në fazën e zbatimit.

Mariani e ka quajtur një surprizë të këndshme që një nga zëvendësit e Kryetarit të Këshillit Shtetëror të Republikës së Krimesë përfaqëson pikërisht këtë pjesë të popullsisë.

Në ditën e dytë të vizitës, delegacioni francez ka mbërritur në Sevastopol ku Thierry Mariani u ka shprehur falënderime autoriteteve lokale, komandës së bazës detare që ndodhet në këtë qytet, si dhe Flotës Ushtarako-Detare të Rusisë për kontributin e dhënë në operacionin antiterrorist në Siri.

“U jam shumë mirënjohës Flotës Ushtarako-Detare ruse dhe qytetit të Sevastopolit, si një bazë detare, për rolin e tyre në operacionin antiterrorist në Siri. Sot, me numrin gjithnjë në rritje të sulmeve vdekjeprurëse në Evropë, duhet të kuptojmë se Daesh është armiku ynë i përbashkët”, tha Mariani.