Pas 40 vitesh, vrasësi i John Lennon kërkon falje: E bëra për famë

Vrasja e ikonës John Lennon ndodhi për famë. Mark Chapman, njeriu që vrau Lennon, i ka kërkuar falje vejushës së muzikantit të famshëm 40 vite pas krimit. Chapman e qëlloi me armë zjarri Lennonin 4 herë, në një ngjarje që ndodhi në Manhatan, në vitin 1980.

Muajin e kaluar, atij iu refuzua lirimi me kusht për të njëmbëdhjetën herë. Gjatë seancës dëgjimore, ai tha se e vrau 40-vjeçarin që të fitonte famë dhe shtoi se meritonte dënimin me vdekje.

“Dua të theksoj se më vjen keq për krimin që kam kryer. Nuk kam justifikim. E bëra për famë. Mendoj se krimi më i keq i mundshëm është që të vrasësh dikë të pafajshëm. Ai ishte njeri familjar, ishte ikonë, ishte jashtëzakonisht i famshëm. Unë e vrava sepse ishte shumë, shumë, shumë, shumë i famshëm dhe unë kërkoja lavdi personale”, ka thënë Chapman përpara komisionit që do të merrte vendimin për lirimin e tij me kusht.

“Më vjen keq për dhimbjen që i kam shkaktuar gruas së tij. Më rri mendja aty gjatë gjithë kohës”, shtoi Chapman, i cili e kreu vrasjen kur ishte 25 vjeç dhe sot është 65 vjeç.