Plani i ri për Ukrainën, zbulohet projekti amerikan me zona neutrale pa trupa të NATO-s

SHBA po shqyrton një plan për krijimin e një zone të çmilitarizuar mes Rusisë dhe Ukrainës, e cila do të monitorohej nga satelitë dhe dronë amerikanë, por pa praninë e trupave tokësore të NATO-s.

Sipas raportimeve të NBC News, në vend të forcave të aleancës, po diskutohet mundësia që në këtë zonë të përfshihen trupa nga vende joanëtare të NATO-s, si Arabia Saudite apo Bangladeshi. Ky skenar parashikon që asnjë ushtar amerikan të mos vendoset në Ukrainë, ndërsa Kievi të nënshkruajë marrëveshje sigurie dypalëshe me partnerë jashtë kornizës së nenit 5 të NATO-s.

Një element kyç i diskutimeve është shmangia e përfshirjes direkte të NATO-s, për të mos provokuar reagim nga Kremlini. Megjithatë, sfidë mbetet përcaktimi i kritereve se çfarë do të konsiderohej shkelje nga Rusia dhe cili do të ishte reagimi i palës tjetër. Po ashtu, bisedimet përfshijnë edhe çështjen e sigurisë në Detin e Zi, ku Turqia do të ketë rol kryesor në garantimin e lëvizjes së lirë të anijeve.

Plani, për momentin, mbetet vetëm në fazë diskutimi, pasi kërkon dakordësinë e presidentit rus Vladimir Putin, homologut të tij ukrainas Volodymyr Zelensky, si dhe udhëheqësve të vendeve të tjera të përfshira, përfshirë presidentin amerikan Donald Trump.