Presidenti i Zvicrës: ‘Facebook’ ka dështuar me monedhën digjitale Libra

‘Facebook’ ka dështuar me monedhën digjitale Libra. Ky fakt është bërë i ditur nga presidenti i Zvicrës, Ueli Maurer, i cili thekson se projekti ka nevojë për përpunim. “Unë nuk mendoj se ekziston ndonjë mundësi për Libra-n në formën e tanishme, sepse bankat qendrore nuk do ta pranojnë atë. Projekti, në këtë formë, ka dështuar”, -tha Maurer.

‘Facebook’ ka kërkuar mbështetje ligjore nga Zvicra për monedhën digjitale. Ndërkohë, kompania nuk ka komentuar deklaratat e presidentit të Zvicrës. Planet për monedhën digjitale të drejtuar nga Facebook-u, e cila do të lëshohet dhe menaxhohet nga Shoqata e Libra-s me bazë në Gjenevë, kanë ngritur shqetësime midis rregullatorëve dhe politikanëve, duke filluar nga çështjet e privatësisë dhe deri te potenciali i saj për të ndikuar në politikën monetare dhe për të ndryshuar situatën financiare në botë.

Nga ana tjetër, zyrtarët që drejtojnë projektin, përfshirë menaxherin e lartë në Facebook, David Marcus, kanë thënë se pengesat rregullatore mund të vonojnë lëshimin në qarkullim të monedhës, të planifikuar për në qershor të vitit 2020.