Putin paralajmëron pushtimin e Ukrainës?

Presidenti rus, Vladimir Putin tha se konflikti në lindje të Ukrainës, në krahinën e Donbasit, “duket si gjenocid”, një përkufizim që rrit shqetësimet për përshkallëzimin e konfliktit në një luftë të plotë. Putin mblodhi këshillin e tij për të drejtat e njeriut në të njëjtën ditë kur presidenti amerikan, Joe Biden, nisi samitin për demokracinë.

Ai tha se “rusofobia” ishte hapi i parë drejt “gjenocidit”, teksa komentoi edhe telefonatën mes Biden dhe presidentit të Ukrainës, Volodymyr Zelenskiy, ku sipas tij u diskutua futja e shtetit në NATO.

“Dua të them se rusofobia është hapi i parë drejt gjenocidit. Ajo që po ndodh tani në Donbas, mund ta shohim fare qartë, e dimë, e duket si gjenocidi që ju sapo përmendët”, u tha Putin të pranishmëve. “Duhet të veprojmë me shumë kujdes”.